കുട്ടികള്‍ക്ക് അപകടം പിണയരുതെന്ന് കരുതി പന്തെടുക്കാന്‍ പുഴയിലിറങ്ങിയ യുവാവ് ഒഴുക്കില്‍പെട്ടു മരിച്ചു

ഫറോക്ക്: പന്തെടുക്കാൻ പുഴയിൽ ഇറങ്ങിയ വിദ്യാർഥി ഒഴുക്കിൽപ്പെട്ടു മരിച്ചു. കരുവൻതിരുത്തി വേട്ടുവൻതൊടി അബ്ദുൾ ഗഫൂറിന്റെ മകൻ മുർഷിദ് (18) ആണ് തിങ്കളാഴ്ച വൈകീട്ട് ചാലിയാറിന്റെ കൈവഴിയായ ഓലശ്ശേരി കടവിൽ ഒഴുക്കിൽപ്പെട്ട് മരിച്ചത്. ഫാറൂഖ് കോളേജിലെ ഡിഗ്രി വിദ്യാർഥിയാണ്. കരുവൻതിരുത്തി ഓലശ്ശേരി കടവിനുസമീപം തിങ്കളാഴ്ച വൈകീട്ട് കുട്ടികൾ പന്തുകളിച്ചുകൊണ്ടിരിക്കെ പന്ത് പുഴയിൽവീണു. അതുവഴി പോവുകയായിരുന്ന മുർഷിദ് അവർക്ക് പന്തെടുത്തുകൊടുക്കാൻ പുഴയിൽ ഇറങ്ങി. ഇതിനിടെ ശക്തമായ ഒഴുക്കിൽപ്പെട്ട് മുങ്ങിപ്പോവുകയായിരുന്നു. മീഞ്ചന്ത ഫയർഫോഴ്സും നാട്ടുകാരും കോസ്റ്റ് ഗാർഡും ഫറോക്ക് പോലീസും നടത്തിയ തിരച്ചിലിനൊടുവിൽ രാത്രി 8.15-ഓടെ മൃതദേഹം പുഴയിൽനിന്ന് ലഭിച്ചു. മാതാവ്: സലീന. സഹോദരങ്ങൾ: മുബഷിർ, അബ്ദുൾ ഫത്താഹ്, നബുഹാൻ, മുഫീദ. മൃതദേഹം പോസ്റ്റ്മോർട്ടം നടപടികൾക്കായി കോഴിക്കോട് ഗവ. മെഡിക്കൽകോളേജിലേക്ക് കൊണ്ടുപോയി. പുഴകണ്ടിരുന്ന്...മുർഷിദ് ഒടുവിൽ മറഞ്ഞു കരുവൻതിരുത്തി: പുഴയിലേക്ക് കാലുനീട്ടിയിരിക്കുന്ന ചിത്രമാണ് മുർഷിദിന്റെ ഫെയ്സ് ബുക്ക് പ്രൊഫൈൽ ഫോട്ടോ. എന്നാൽ ആ പുഴ തന്നെ മരണത്തിലേക്ക് കൊണ്ടുപോവുമെന്ന് മുർഷിദ് ഒരിക്കലും കരുതിക്കാണില്ല. സൗമ്യതയും സൗഹൃദവും നിറഞ്ഞ മുർഷിദിന്റെ വേർപാട് നൊമ്പരത്തോടെയാണ് ഗ്രാമം കേട്ടത്. തിങ്കളാഴ്ച കരുവൻതിരുത്തി ഓലശ്ശേരി കടവിനുസമീപം പന്തുകളിയിൽ ഏർപ്പെട്ട കൊച്ചുകുട്ടികളുടെ പന്ത് പുഴയിൽ വീണു. അതുവഴി പോവുകയായിരുന്ന മുർഷിദ് അവർക്ക് അപകടം പിണയരുതെന്ന് കരുതിയാണ് പന്തെടുത്ത് കൊടുക്കാൻ പുഴയിലേക്ക് ഇറങ്ങിയത്. എന്നാൽ, പുഴയിലെ ശക്തമായ ഒഴുക്കിൽ മുർഷിദ് അകപ്പെടുകയായിരുന്നു. പുഴയോരത്ത് നിന്നിരുന്ന കുട്ടികൾ മുർഷിദ് ആഴങ്ങളിലേയ്ക്ക് പോവുന്നതുകണ്ട് അലറി വിളിച്ചു. കുട്ടികളുടെ നിലവിളികേട്ട് തോണിയുമായി എത്തിയ മത്സ്യത്തൊഴിലാളി രക്ഷിക്കാൻ ശ്രമം നടത്തിയെങ്കിലും മുർഷിദ് മുങ്ങിപ്പോവുകയായിരുന്നു. തുടർന്ന് നാട്ടുകാർ തിരച്ചിൽ നടത്തി . മീഞ്ചന്ത ഫയർ ഓഫീസർ പി.വി. വിശ്വാസും ഫയർഫോഴ്സ് മുങ്ങൽ വിദഗ്ധൻ ഇ. ശിഹാബുദ്ദീനും സിവിൽ ഡിഫൻസ് വൊളന്റിയർമാരും നാട്ടുകാരും ചേർന്ന് നടത്തിയ തിരച്ചിലിനൊടുവിലാണ് മൃതദേഹം കിട്ടിയത്. ചൊവ്വാഴ്ച രാവിലെ ഫറോക്ക് പോലീസിന്റെ നേതൃത്വത്തിൽ ഇൻക്വസ്റ്റ് നടപടികൾ പൂർത്തിയാക്കും. ഫാറൂഖ് കോളേജ് ബി. വോക്. ഒന്നാം വർഷ ഡിഗ്രി വിദ്യാർഥിയാണ് മുർഷിദ്.

from mathrubhumi.latestnews.rssfeed https://ift.tt/3i2SmCy
via IFTTT