ഈ വര്‍ഷം നടത്താനിരുന്ന അണ്ടര്‍-17 വനിതാ ലോകകപ്പ് റദ്ദാക്കി; 2022-ല്‍ ഇന്ത്യയ്ക്ക് ആതിഥ്യം

സൂറിച്ച്: ഇന്ത്യ ആതിഥ്യം വഹിക്കാനിരുന്ന 2020-ലെ അണ്ടർ-17 വനിതാ ഫുട്ബോൾ ലോകകപ്പ് ഫിഫ റദ്ദാക്കി. പകരം 2022-ലെ ഇതേ ലോകകപ്പിന്റെ ആതിഥ്യം അനുവദിച്ചു. കോവിഡ്-19 രോഗത്തിന്റെ പശ്ചാത്തലത്തിലാണ് ബ്യൂറോ ഓഫ് ഫിഫ കൗൺസിൽ തീരുമാനമെടുത്തത്. നേരത്തേ 2021-ലേക്ക് ലോകകപ്പ് നീട്ടിവെച്ചിരുന്നെങ്കിലും നടത്തിപ്പ് ബുദ്ധിമുട്ടാകുമെന്ന വിലയിരുത്തലിലാണ് പുതിയ തീരുമാനം. കോസ്റ്റാറിക്കയ്ക്ക് അനുവദിച്ചിരുന്ന 2020-ലെ അണ്ടർ-20 വനിതാ ലോകകപ്പും ഇതുപോലെ റദ്ദാക്കുകയും 2022-ലെ ലോകകപ്പ് അനുവദിക്കുകയും ചെയ്തു. 2020-ലെ ക്ലബ്ബ് ലോകകപ്പ് അടുത്തവർഷം ഫെബ്രുവരിയിൽ ഖത്തറിൽ നടത്താനും തീരുമാനമായി. 2021 ഫെബ്രുവരിയിലേക്കായിരുന്നു അണ്ടർ-17 വനിതാ ഫുട്ബോൾ ലോകകപ്പ് മാറ്റിവെച്ചിരുന്നത്. ഈ വർഷം നവംബറിൽ നടക്കേണ്ടിയിരുന്ന ലോകകപ്പ് ടൂർണമെന്റായിരുന്നു ഇത്. ടൂർണമെന്റ് മാറ്റിവെച്ചത് ഈ വർഷത്തെ ലോകകപ്പ് മുന്നിൽ കണ്ട് ടീമിനെ ഒരുക്കിയ ഇന്ത്യയ്ക്ക് കനത്ത തിരിച്ചടിയായി. 2022-ൽ നിലവിലെ ടീമിലെ താരങ്ങളുടെ പ്രായപരിധി അവസാനിക്കും. ഇതോടെ ഇന്ത്യയ്ക്ക് ഇനി 2022 മുന്നിൽകണ്ട് ടീമിനെ ഒരുക്കണം. Content Highlights: FIFA cancelled U-17 Women s World Cup India to host in 2022

from mathrubhumi.latestnews.rssfeed https://ift.tt/3lKtDny
via IFTTT